Кралот на Белгија ја одби оставката на премиерот Барт де Вевер и побара од него веднаш да ги продолжи преговорите за буџетот.
„Кралот одлучи да ја одбие оставката на премиерот и побара од него веднаш да ги продолжи буџетските преговори. Премиерот повторно ќе го информира кралот во понеделник, на 16 ноември“, се наведува во соопштението на белгиската Кралска палата.
Де Вевер, кој е фламански конзервативец, поднесе оставка во понеделникот поради продолжената буџетска криза, откако коалициските партнери не успеаја да постигнат договор за планот за јавни расходи за 2027 година.
Кралската палата соопшти дека кралот Филип ја ставил својата одлука на чекање и дека во вторник ќе започне разговори со лидерите на политичките партии. „По разговорите со лидерите на петте партии од владејачкото мнозинство, кралот констатираше дека сите се посветени на што поскоро завршување на буџетските преговори. Сите ја потврдија својата решеност да постигнат договор за стабилна буџетска рамка за следните три години“, соопштија од кралската палата.
Во соопштението се наведува и дека кралот добил „формална обврска од петте лидери дека нивните партии се подготвени на отстапки за да се постигне договор во рамките на владата“.
Де Вевер се обидува до 2029 година да обезбеди 10 милијарди евра за покривање на буџетскиот дефицит, но коалициските партии имаат спротивставени ставови за тоа како да се обезбедат средствата.
Меѓу предложените мерки се намалување на јавните расходи и зголемување на ДДВ, на што се противи франкофонското либерално Реформистичко движење.