Стотици илјади граѓани излегоа на улиците низ Франција, протестирајќи против ниските плати и зголемувањето на трошоците за живот.
Според француското Министерство за внатрешни работи, до 18 часот биле регистрирани 448 апсења, повредени 53 полицајци и 86 инциденти со пожари. Надлежните соопштија дека повеќето од одобрените протестни маршеви поминале мирно, но тензии биле забележани во Париз, Лион, Рен и Тулуз.
Во однос на бројот на учесници, Министерството за внатрешни работи проценува дека на протестите учествувале околу 575.000 лица, од кои 65.000 во Париз. Синдикатот CGT, пак, тврди дека бројот на демонстранти на национално ниво достигнал 1,6 милиони, вклучително и 350.000 во главниот град.
Генералната секретарка на CGT, Софи Бине, го оцени штрајкот како исклучително успешен, барајќи од владата зголемување на платите за сите вработени и раст на минималната плата за 10 отсто.
По протестите, владата најави одржување социјална конференција во понеделник во Матигнон, на која се очекува да учествуваат претставници на синдикатите и организациите на работодавачи.
Штрајкот предизвика прекини и во образовниот сектор. Според Министерството за високо образование, наставните активности биле прекинати во 60 од вкупно 184 образовни институции.
Во меѓувреме, синдикатот SNES-FSU соопшти дека учеството во штрајкот меѓу вработените во средните училишта достигнало 52 отсто.
Полицијата интервенирала и за отстранување на блокадите што студентите ги поставиле во неколку градови, меѓу кои Париз и Бордо.
Протестите се дел од студентското движење кое започна во средината на септември, со барања поврзани со условите за студирање, финансирањето и прашањата за вработените во образованието.