Бизнисмени од Куманово се жалат – киосци ја блокираат глетката и тротоарот

На овие фотографии испратени до нашата редакција се гледаат револтирани трговци кои се обидуваат да го спречат поставувањето на метални конструкции пред нивните дуќани во Куманово.

ТВ21 ги посети на денот кога истече рокот што Општината им го дала за состанок и разгледување на нивните маки. Но, во Општината никој не ги прими.

Бизнисмените сметаат дека неправедно е узурпирана јавната површина на тротоарот. Велат дека Општината издала дозвола на приватна компанија за продажба, но таа ја злоупотребила дозволата, проширувајќи ги објектите во киосци за продажба, со што се нарушува влезот и изгледот на нивните дуќани.

„Никогаш овде не постоела автобуска станица, а сега имаме дуќан пред дуќан. Дали е можно ова? Киоскот е поставен шест метри пред фирмите. Нашите брендови не се гледаат. Јас сум роден овде и никогаш не сум видел вакво нешто. Ни го зедоа духот на трите дуќани.“

„Ова не е само за патници, го направија како кафуле. Ние работиме овде 4–5 години. Претходно имаше мала точка за чекање, но ова го поставија пред една недела. Не знам зошто им требаше толку големо. Ни ги затвори сите дуќани. Од овие дуќани живееме.“

„Ова не е реално. Не е нормално. Од 1993 година овој локал работи и никогаш не е затворен. А сега да ми отворат дуќан пред дуќан – тоа никаде го нема.“

„Конкретно ни пречат рекламите и изгледот на киоскот. За седиштата за чекање автобус немаме проблем, во други градови има такви точки. Но, одлука беше донесена пред 10 години киосците да се тргнат од тротоарите, а сега носат нова одлука за поставување нови.“

Пред неколку дена, во присуство на полиција, компанијата која ги поставува металните конструкции се соочи со отпор од страна на бизнисмените во околината. Освен што се блокира погледот, се намалува и просторот на тротоарот – не останува ни половина метар за движење на пешаци, лица со посебни потреби или детски колички.

Од Општина Куманово велат дека компанијата која го добила тендерот ќе ги изгради и одржува овие точки за продажба на билети во наредните 10 години.

„Овој проект е изгласан од Советот на Општина Куманово во март 2023 година, каде се наведува дека на 33 автобуските станици низ градот ќе се изградат три вида на точки за чекање. За нив, Општината ќе наплаќа месечна кирија за користење на јавниот простор, како и околу 10.000 денари такса за секоја точка за рекламен банер.“, велат од општината.

Од Општина Куманово дополнуваат дека не се информирани од компанијата добитник на тендерот „Медиа Груп“ дека на овие точки се поставени киосци за продажба на комерцијална стока, бидејќи во јавниот повик јасно е наведено дека точките се само за автобуски патници и продажба на билети.

Доколку се утврди прекршување на договорот, ќе се преземат конкретни мерки за отстранување на конструкции кои ги надминуваат дозволените градежни спецификации. ТВ21 се обиде да стапи во контакт со компанијата, но тие беа недостапни.