Украинскиот претседател Володимир Зеленски изјави дека би размислил за замрзнување на моменталните линии на фронтот, со цел да се постигне мировен договор со Русија и преку дипломатски средства да се стави крај на долгогодишната војна. Како што пренесува „Њујорк пост“, во гостувањето во емисијата „Fox & Friends“ во средата наутро, Зеленски рече дека е подготвен веднаш да ги запре борбите, иако руските трупи се соочуваат со значителни тешкотии на бојното поле.
На прашањето дали би запрел сè „токму сега“ – во сценарио во кое Украина сè уште би контролирала „75% или повеќе од својата територија“ – Зеленски одговори потврдно. „Да, во овој момент мораме да го замрзнеме конфликтот и мислам дека тоа е реален начин да се стави крај на оваа војна. Ние тоа го нарекуваме прекин на огнот… Претседателот Трамп го нарече замрзнување и запирање“, рече тој.
Тој додаде дека ова е минимумот што Украина денес го бара од Русија. „А потоа, се разбира, ќе им се обратиме на претседателот [Трамп] и на Европејците за да побараме безбедносни гаранции“, најави Зеленски.
Тој нагласи дека најважниот аспект при преговарањето за мировен договор е обезбедувањето гаранции дека руската агресија и окупација нема да се повторат.
На прашањето од водителот Брајан Килмид дали би бил подготвен да се откаже од регионот Донбас заради мирот, украинскиот лидер одговори дека тоа „не би било фер“.
„Тие не победуваат на бојното поле. Затоа сакаат да извршат притисок врз нас, користејќи секаков вид притисок за да нè истераат од нашата земја. Тоа не е фер“, рече тој. „Луѓето се уморни, се разбира; сакаме да ја завршиме оваа војна што е можно поскоро“, продолжи Зеленски, но нагласи дека неговите сонародници сакаат да останат во својата земја.