Продолжуваат напорите за гаснење на пожарот во „Чернобил“, каде што се работи на две тлеечки жаришта во изолацијата на покривот, пренесе Укринформ, повикувајќи се на Државната служба за итни случаи на Украина.
Освен тоа, започнало и делумно демонтирање на структурата на заштитниот саркофаг, се додава во објавата на „Телеграм“.
Три спасувачки тимови на службата учествуваат во операцијата, со постојан надзор на состојбата преку дронови опремени со термовизиски камери.
Украинските власти уверуваат дека нивото на радијација на локацијата на централата останува во нормални граници и нема закана за жителите. Ситуацијата е под контрола.
На 14 февруари, руски дрон со експлозивна боева глава го погоди заштитниот саркофаг изграден околу оштетениот четврти реактор на АЕЦ „Чернобил“, објави Укринформ. Службата за безбедност на Украина потврди дека остатоци од руски ударен дрон од типот „Шахед“ („Геран-2“) биле пронајдени во и во близина на заштитната структура. Експертите сметаат дека нападот врз нуклеарната централа бил намерен.
Подоцна истиот ден, избувнале пожари на надворешната обвивка на конструкцијата на Новата структура за безбедно задржување.
Главниот инженер на АЕЦ „Чернобил“ Олександар Титарчук предупреди дека, под одредени услови, ударот со дрон би можел да доведе до испуштање на радиоактивни материјали.
По инцидентот, Украина ја повика Меѓународната агенција за атомска енергија (МААЕ) да преземе итни мерки за да спречи идни руски напади врз нуклеарни постројки, пренесе БТА. Генералниот директор на МААЕ, Рафаел Гроси, го нарече нападот „многу сериозен инцидент“ и истакна дека нуклеарната безбедност во Украина останува под сериозна закана.
На 17 февруари, откако беше утврдено повторно разгорување, напорите за гаснење на пожарот во АЕЦ „Чернобил“ беа обновени.