Божиновска: Не може под исто министерство да биде производството на струја и дистрибуцијата

Во интервју за Радио Слободна Европа (РСЕ), министерката за енергетика, рударство и минерални суровини Сања Божиновска, зборуваше за струјата и за долгорочните планови како Македонија да стане независна од увоз на струја.

„Наследивме големи проблеми во сите енергетски сектори и моментално работиме на изработка на Законот за енергетика и секако тука сме во зимскиот период. Значи најмногу фокусот е на обезбедување на електрична енергија за граѓаните. Правиме стратегии, краткорочни и долгорочни. Краткорочните се фокусирани на рударскиот комбинат РЕК Битола и снабдување на јаглен и ангажирање на сите енергетски капацитети.

Додека долгорочните е правање на нови капацитети. Крајот на минатата година потпишавме скоро 100 мегавати за изградба на зелена енергија и се надеваме дека ќе продолжи ова и понатаму“, рече Божиновска.

За раскинувањето на договорот на ЕСМ со Марковски компани, Божиновска одоговори.

„Договорот беше раскинат со тој економски оператор. За да се направи нов тендер, потребен е долг временски период, Така како што сме во зимскиот период, каде што е многу критично снабдувањето со електрична енергија, беа повикани сите пет подизведувачи кои биле вклучени во предходниот процес, што значи не е договорено само со еден економски оператор. На крајот понудиле само две од економскиот оператор и е одобрано со тоа што има 15% поефтина цена имаме добиено“, изјави министерката и рече дека смета оти има поголем криминал во РЕК Битола од овие 6 милиони евра.

Божиновска кажа дека не треба прозводството и дистрибуцијата на струја да биде под исто министерство.

„Работиме на новиот Закон за енергетика и со новиот Закон за енергетика МЕПСО ќе дојде под капата на Министерството, што мислам дека е природно и нормално. Со тоа што мора да внимаваме дека АД ЕСМ ќе остане под Владата, МЕПСО ќе биде под Министерството за енергетика. Бидејќи не може да се под исто министерство и производство и дистрибуција. Значи тоа е согласно Европските регулативи“, кажа Божиновска.