Бројот на загинати во катастрофалните земјотреси што ја погодија Венецуела продолжува да расте. Според најновите официјални податоци, животот го загубиле најмалку 589 лица, додека 2.980 луѓе се повредени, а спасувачките екипи и натаму неуморно трагаат по преживеани под урнатините.
Вршителката на должноста претседател, Делси Родригез, соопшти дека спасувачките операции се одвиваат без прекин и дека приоритет е извлекување на сите лица кои сè уште се заробени.
„Ќе ги спасиме луѓето што се заробени. Неуморно работиме на таа задача“, изјави Родригез при пречекот на меѓународните спасувачки тимови кои пристигнаа во земјата за да помогнат во справувањето со последиците од катастрофата.
Најтешко погодена останува државата Ла Гваира, која во ноќта меѓу средата и четвртокот беше погодена од два силни земјотреси со јачина од 7,2 и 7,5 степени според Рихтеровата скала.
Во погодените региони е засилено присуството на армијата, додека спасувачките служби продолжуваат со расчистување на урнатините, потрага по исчезнати и дистрибуција на храна, вода и друга неопходна помош.
Властите предупредуваат дека бројот на жртвите најверојатно ќе продолжи да расте, бидејќи илјадници лица сè уште се водат како исчезнати. Според проценките на Меѓународната организација за миграции, последиците од земјотресите би можеле да погодат околу 6,76 милиони луѓе низ Венецуела, меѓу кои и речиси два милиони жители на Каракас.
Во меѓувреме, стотици жители на главниот град ноќта ја поминаа во паркови, на паркинзи и на други отворени простори, стравувајќи од нови потреси и од можноста да се вратат во оштетените домови.
Родригез ја посети најпогодената област, каде со локалните власти ја координираше натамошната акција за справување со последиците. Владата веќе нареди мобилизација на тешка механизација и итна испорака на вода, храна, душеци и ќебиња за погоденото население.