На Градскиот плоштад во Скопје денеска му се оддава последна почит на Аки Рахимовски, еден од најдобрите рок-вокалисти во регионот.
Отворена е Книга на жалост, а се слушаат и неговите песни.
Главното собирање е предвидено попладне, од 18:00 до 19:30 часот, кога хорови, пејачи и пријатели, заеднички, за збогување, ќе отпејат некои од најголемите хитови на „Парни ваљак“.
Оддавањето последна почит под мотото „Да го испратиме со песна нашиот Аки“ го организира радио „Бубамара“ со поддршка на КЛС Саунд и Град Скопје, ден пред погребот на музичката мега ѕвезда во Загреб.
На Градскиот плоштад ќе може да се слушне и песната „Ако згрешам, нека изгорам“ на Пепи Бафтировски која Аки во клавирска придружба ја сними пред пет години во студиото на „Тавитјан брадерс“. Тоа е неговата последна снимка кај нас. Неделава, оваа песна се емитува како хит на „Бубамара“.
Аки Рахимовски преку четири децении беше пејач на „Парни ваљак“. Почина на 22 јануари 2022 година. Зад себе остави хитови со кои раснеа многу генерации.