Пратеничката Дафина Стојаноска преку објава на социјалните мрежи се огласи по оставката на републичкиот јавен обвинител Љупчо Коцевски, оценувајќи дека ваквиот потег претставува индиректно признание за причините поради кои беше покрената постапка за негово разрешување.
„Избегнување на соочување со Собранието е признание на причините за негово разрешување“, напиша Стојаноска на Фејсбук.
Нејзината реакција доаѓа откако Коцевски денеска до Собранието поднесе неотповиклива оставка, непосредно пред закажаната седница на која требаше да се разгледува предлогот за негово разрешување од функцијата јавен обвинител на Република Северна Македонија.
Со поднесената оставка, расправата за неговото разрешување беше тргната од дневниот ред, а Собранието го констатираше престанокот на функцијата. Политичките реакции продолжуваат, при што дел од пратениците сметаат дека оставката е потврда за сериозните забелешки за работата и интегритетот на Јавното обвинителство.