Европската Унија ќе обезбеди итна хуманитарна помош во вредност од пет милиони евра за заедниците погодени од катастрофалните земјотреси во Венецуела, соопшти високата претставничка на ЕУ за надворешна и безбедносна политика, Каја Калас.
Калас на платформата Икс информираше дека разговарала со привремената претседателка на Венецуела, Делси Родригез, за да ја изрази солидарноста на Европската Унија со венецуелскиот народ по разорната природна катастрофа.
„Го активиравме Механизмот на ЕУ за цивилна заштита, а неколку земји членки веќе испратија тимови за потрага и спасување, пожарникари и медицински персонал“, напиша Калас.
Таа додаде дека сателитскиот систем на ЕУ „Коперникус“ помага во проценката на размерите на штетите и во насочувањето на помошта кон најпогодените подрачја.
Според досегашните информации на венецуелските власти, најмалку 1.430 лица загинаа во двата последователни земјотреси со магнитуда од 7,2 и 7,5 степени, кои во средата го погодија северниот дел на земјата.
Повеќе од 50.000 лица сè уште се водат како исчезнати, додека според податоците на Обединетите нации, последиците од катастрофата погодиле околу седум милиони луѓе.