Режисерот Дарко Митревски најави нов филм поврзан со неговиот култен филм „Бал-кан-кан“ од 2005 година. За главните улоги ги планира Сашко Коцев, Тони Михајловски и Јелена Јованова.
Митревски на средба со новинари во Скопје откри дека сценариото е веќе напишано, а во тек се подготовките за буџетот, продукцијата и екипирањето на филмот. Потоа ќе следува аплицирање за финансиска поддршка и обезбедување спонзори.
Филмот, според најавата на режисерот, ќе биде љубовна и еротска црна комедија сместена во современа Македонија, со приказна за двајца луѓе на маргините на општеството кои преку социјалните мрежи се обидуваат да го променат својот живот.
„Приказната е цинична и смешна, но во суштина не е комедија, туку горчлив коментар на нашите животи во моментов“, рече Митревски.
Работниот наслов на филмот сè уште не е откриен, но режисерот најави дека ќе биде инспириран од познат македонски шлагер.