Од модернизацијата на вооружувањето и воената опрема до справувањето со сајбер и хибридни закани – Армијата на Македонија има за цел дополнително да ги зајакне своите капацитети и улогата во рамките на НАТО. На Денот на Армијата, претседателката Гордана Силјановска-Давкова ја оцени како професионална, доверлива и интероперабилна сојузничка сила, притоа нагласувајќи дека безбедноста бара инвестиции и прилагодување кон новите предизвици.
„Цврсто верувам дека колку е побезбедна нашата одбранбена поставеност, толку е позначаен нашиот придонес кон заедничката безбедност. Токму затоа, зајакнувањето на нашите капацитети е вистинскиот начин да ја зацврстиме нашата позиција во Алијансата како сериозна и доверлива членка на која може да ѝ се верува и на која можеме да се потпреме“, изјави претседателката Гордана Силјановска-Давкова.
Министерот за одбрана, Владо Мисајловски, рече дека модернизацијата на Армијата се одвива според планот. Оклопните возила JLTV и Stryker, артилериските системи Boran и поголемиот дел од системите за противвоздушна одбрана Mistral 3 се испорачани, додека првите два нови хеликоптери се очекуваат до крајот на годината.
„Одбраната и Армијата треба секој ден да бидат посилни, помотивирани и подобро опремени, затоа ќе имаме нов колективен договор, но ова решение ќе биде во корист на професионалните војници над 45 години и, од оваа говорница, сакам да најавам зголемување на платите и подобри услови за работа“, изјави Владо Мисајловски, министер за одбрана.
Началникот на Генералштабот, генерал-мајор Сашко Лафчиски, рече дека изминатата година била успешна за Армијата, која уште еднаш ја потврдила оперативната подготвеност и способноста за справување со современите безбедносни предизвици.
„Но безбедноста денес не се определува само на бојното поле; хибридните закани, сајбер нападите, дезинформациите, обидите за манипулирање со јавното мислење и ерозијата на довербата во институциите претставуваат сериозен предизвик за стабилноста и безбедноста на целото општество“, изјави Началникот на Генералштабот Сашко Лафчиски.
На свеченоста беа доделени одликувања и признанија за припадници и единици на Армијата. Современата Армија започна да се гради во 1992 година, а денес, како дел од НАТО од 2020 година, е составен дел од заедничкиот безбедносен систем на Алијансата.