Неколку десетици илјади луѓе се собраа денеска во Берлин осудувајќи го зближувањето на десницата и екстремната десница, три недели пред парламентарните избори во Германија.
Берлинската полиција соопшти дека се собрале околу 20.000 луѓе, но дека пристигнуваат уште демонстранти. Насобраните носат транспаренти со натписи „Срам да ти е ЦДУ“ и „Мерц без срце“.
Германските конзервативци и екстремната десница ги здружија силите минатата недела за да усвојат текст во парламентот чија цел е заострување на мигрантската политика во земјата.
Текстот, кој не е обврзувачки, има голема симболичка вредност. Тој беше предложен од конзервативците, фаворити во анкетите пред изборите на 23 февруари, а ја доби поддршката од екстремно десничарската Алтернатива за Германија (АфД), без која текстот не може да биде усвоен.
Тој текст, меѓу другото, бара Германија да ги врати на границата сите странци без валидни документи за влез, вклучително и барателите на азил.
Околу 500 полицајци денеска беа распоредени за обезбедување на собирот што се одржува во близина на германскиот парламент.
Во саботата, повеќе од 220.000 луѓе демонстрираа во големите градови во земјата, како Хамбург, Лајпциг, Келн и Штутгарт, објави телевизијата АРД.
Од Втората светска војна, „отсекогаш постоел јасен консензус меѓу сите демократи во нашите парламенти – дека не правиме заеднички акции со екстремната десница“, рече канцеларот, социјалдемократот Олаф Шолц, кој го обвини својот конзервативен противник Фридрих Мерц. на тоа тој стави крај на консензусот постигнат во 1949 година.
Дебатата беше поттикната од неодамнешниот напад со нож, за кој беше обвинет Авганистанец без документи со ментални здравствени проблеми.
Тогаш беше убиено едно дете, додека во декември имаше и напад со автомобил чиј возач (со потекло од Саудиска Арабија) намерно налетал на луѓе на божиќниот пазар.