Десетици основни и средни училишта низ Србија денеска добија закани за поставени бомби преку електронска пошта, што доведе до евакуација на многу од нив; сепак, засега нема потврда дека која било од заканите била реална.
На територијата што ја покрива Полициската управа Краљево, закани добиле 21 училиште – 18 на територијата на Краљево и три во Врњачка Бања и околината. Учениците биле испратени дома, а полицијата извршила антидиверзиони прегледи.
Полицијата во Лесковац за Радио-телевизија Србија (РТС) потврди дека закани пристигнале и во 23 основни и средни училишта во Јабланичкиот округ.
Полициската управа Чачак евидентирала закани за бомби во 20 училишта, додека во Златиборскиот округ биле пријавени 17, а во Расинскиот округ 14 училишта.
Во текот на утрото и остатокот од денот, полицијата спровела антидиверзиони прегледи и увид на лице место во неколку училишта во Белград и Шабац.
Закани за бомби добиле и 27 основни училишта во Севернобачкиот округ: 18 во Суботица, седум во Бачка Топола и две во Мали Иѓош.
На подрачјето што го покрива Школската управа Ниш, пријавени се закани за бомби во четири основни училишта – едно во Куршумлија, две во Алексинац и едно во Ниш. По извршените прегледи на училишните простории, учениците во Ниш се вратиле на настава. Дополнително, закани биле пријавени во 23 основни училишта на територијата на Полициската управа Пожаревац. Како што пренесоа белградските медиуми, во текот на попладнето полициски проверки се одвивале во дваесетина основни и средни училишта на територијата на Нови Пазар, Тутин и Сјеница.
Министерството за внатрешни работи сè уште нема објавено официјално соопштение за бројот на извршени проверки, но податоците од терен укажуваат на тоа дека пријавите за наводно поставени бомби биле лажни.