ДУИ – огранокот во Тетово од градскиот плоштад ја претстави изложбата што ја нарече „изложба на срамот“.
Според нив, општина Тетово се обидува да продаде 56 илјади квадратни метри градежно земјиште врз основа на планот од 1 евро за квадратен метар.
„Како што веќе објавивме, станува збор за над 56 илјади квадратни метри имот што им припаѓа на граѓаните на Тетово, кој преку шеми веќе познати на јавноста, како што е онаа на Монополот, се обидува да им се „подари“ на луѓе блиски до власта. Главниот мотив се огромните материјални придобивки на актуелното раководство и нивниот близок круг. Денес презентираме некои од клучните локации што се наоѓаат на оваа црна листа, јасно илустрирајќи што сакаат да направат кумот на продажбата на јавен имот, Аднан Азизи, и извршителот и потписникот на овој план, Билал Касами“, изјави Арбреша Незири од огранокот на ДУИ во Тетово.
Заменик-градоначалникот на Тетово, Алби Ќамили, во писмен одговор ги нарече овие тврдења клевети, нагласувајќи дека народот знае кој продал половина од Тетово, а тоа според него се Теута Арифи и Бајрам Реџепи.
„Должност на медиумите е да ги проверат фактите пред да емитуваат секакви клевети како да се вистинити. Не станува збор за никаква продажба. Го одобривме годишниот план, што е законска постапка што ја одобруваме секоја година, 5 години по ред, за заштита на јавните имоти од узурпација. Народот знае кој продаде половина Тетово за 1 евро/м2. Бајрам Реџепи, Теута Арифи и ДУИ“, нагласи Алби Ќамили, заменик-градоначалник на Тетово.
Усвојувањето на стариот план во општинскиот совет на Тетово за државно земјиште ја отвори дебатата во Тетово, каде што опозициската ДУИ обвинува дека го продаваат општинското земјиште, додека од Општина Тетово велат дека станува збор само за годишен план за да знае општината каде се нејзините имоти.