Опозициската Демократска унија за интеграција реагира остро на, како што го нарекува, „скандалозниот притисок од севернокорејски тип“ од ВМРО-ДПМНЕ и Антонио Милошоски кон Обвинителството и правосудството, наведувајќи дека таквото однесување сериозно го нарушува правниот систем во земјата.
Според ДУИ, ВМРО-ДПМНЕ порано се жалела на политички прогон од СДСМ и Специјалното јавно обвинителство, додека денес, според нив, се однесува на ист начин и од „прогонета“ станала „прогонител“.
„ВМРО да престане со партизацијата на Обвинителството и политичкиот прогон. Демократската унија за интеграција веќе ја информираше целата меѓународна заедница, која е скандализирана од бруталниот партиски притисок и пораките кон обвинителството. Го охрабруваме обвинителството таму каде што нема дело, нема докази и нема штета, да ги отфрли политичките кривични пријави за политички прогон и да не потклекне под владин и партиски притисок, туку да постапува согласно законот“, велат од ДУИ.
Реакцијата следи по тоа што Милошоски вчера побара од Обвинителството да ја преиспита одлуката за „Мазут“ и да донесе корекција за запирање на истрагата. Тој истакна дека жалбата на ЕСМ покажува дека обвинителката Коларевиќ постапила непрофесионално и дека истрагата за случајот „Мазут“ вреден 167 милиони евра е прекината паушално, при што, според него, се исклучени клучни докази.
„Приговорот на ЕСМ е нова околност според којашто прекинатата истрага за мазут може да продолжи, бидејќи ЕСМ е оштетено правно лице коешто ги побива изјавите на Коларевиќ и Абази како обвинителски тандем којшто им дал повластена улога и им поклонил поголема верба на исказите на Капушевски, Јахоски, Адријан Муча, Ерџан Сулкоски, а воопшто го немале ниту достапен Васко Ковачевски“, вели Милошоски.
Инаку, државната компанија EСМ поднела жалба до Вишото јавно обвинителство по одлуката на Обвинителството за организиран криминал и корупција за запирање на истрагата за набавките на мазут за ТЕЦ „Неготино“, барајќи преиспитување на случајот и контрола на постапката. Според ЕСМ, изјавите дадени во текот на истрагата биле технички и не претставуваат оценка за евентуална штета, додека претходно обвинителството соопшти дека не се утврдени елементи на кривично дело во овој случај.