Амбасадорот на Европската Унија во Северна Македонија, Михалис Рокас, денеска ќе престојува во работна посета на Штип, во рамки на иницијативата за доближување на европските политики и процесот на евроинтеграција до локалните заедници низ државата.
За време на посетата, Рокас ќе оствари средба со градоначалникот на Штип, Иван Јорданов, како и со членовите на Општинскиот совет. На средбите ќе стане збор за придобивките од членството во Европската Унија, тековниот процес на интеграција на земјата и конкретните ефекти од европската финансиска поддршка врз развојот на локалната заедница.
Во фокусот на разговорите ќе бидат и проектите реализирани со поддршка од ЕУ, како и можностите за понатамошна соработка и инвестиции во регионот.
Во рамки на агендата, амбасадорот ќе се сретне и со претставници на граѓанскиот сектор, по што ќе учествува на отворена дискусија со граѓаните на Штип. Целта е да се овозможи директна комуникација за прашањата поврзани со европските интеграции и улогата на Европската Унија во поддршката на реформските процеси во земјата.
Посетата е дел од пошироките активности на Делегацијата на Европската Унија насочени кон зајакнување на дијалогот со локалните заедници и поголема информираност на граѓаните за европските политики и можностите што ги нуди евроинтегративниот процес.