Европа се соочува со нов бран на екстремни горештини, кој се очекува да ги урне температурните рекорди за месец јуни во неколку земји. Ова е втор топлотен бран што го погодува западниот дел на континентот за помалку од еден месец, додека експертите продолжуваат да предупредуваат дека климатските промени ги прават екстремните временски појави сè почести и поинтензивни.
Франција е меѓу најпогодените земји, каде температурите се приближуваат до 40 степени Целзиусови. Властите ставија десетици департмани под црвен аларм – највисоко ниво на опасност, додека претседателот Емануел Макрон ги повика граѓаните да покажат посебна грижа за постарите лица, децата и најранливите категории. Поради големите горештини откажани се неколку јавни активности, вклучително концерти и културни настани, а во областите со највисок степен на тревога е забранета и консумацијата на алкохол на јавни места. Се очекува стотици училишта да останат затворени за да се заштитат учениците и образовниот кадар.
Високи температури се регистрираат и во Шпанија, Португалија, Швајцарија и Обединетото Кралство. Во Мадрид е откажан јавниот пренос на натпревар од Светското првенство поради ризикот од екстремна жештина, додека во Португалија се очекува термометрите да достигнат до 42 степени Целзиусови. Швајцарија предупреди на тежок и долготраен топлотен бран, додека Велика Британија издаде портокалов аларм за делови од Англија и Велс.
Предупредувања за високи температури се издадени и на Балканот. Во Хрватска и Србија се очекуваат температури до 35 степени Целзиусови, додека во Македонија температурите веќе достигнаа 35 степени и во наредните денови во некои региони може да се искачат до 38 степени Целзиусови. Здравствените власти во повеќе земји препорачуваат избегнување изложеност на сонце во најтоплиот дел од денот и внесување доволни количини вода за да се спречат здравствени проблеми предизвикани од екстремните температури.