Трагичен настан ја потресе туристичката сезона во Ксамил, Албанија, каде што во раните утрински часови бил пронајден безживотен 20-годишен француски државјанин.
Според информациите од албанската полиција, телото на младиот Мигел Мендес било пронајдено околу 5:15 часот на лежалка на плажа.
Постојат сомневања дека младиот Французин бил нападнат и избоден со нож. Полицијата како осомничен го посочува 29-годишниот Сократ Вата од северниот албански град Хас, кој по инцидентот избегал од местото на настанот.
Полициските служби веднаш започнале потрага по осомничениот со цел негово пронаоѓање и апсење.
Во меѓувреме, истражна група е на местото на настанот и, под раководство на надлежното обвинителство, работи на утврдување на сите околности поврзани со случајот.
Истрагата продолжува, а надлежните органи работат на целосно расветлување на настанот и утврдување на одговорноста за смртта на младиот француски државјанин.