Противпожарен апарат беше поставен пред тетовскиот суд и обвинителство од иницијативата „Нула“ која ја сочинуваат средношколци и студенти. Целта е судиите да преземат поголема одговорност и да ги најдат одговорните за катастрофите како таа во Кочани каде загинаа 59 млади луѓе, пожарот во модуларната болница каде загинаа 14 пациенти, несреќата во Беса Транс каде загинаа 45 граѓани и Дурмо Турс во Ласкарци каде загинаа 16 лица.
-Неказнувањето носи институционална неодговорност, неказнивоста носи во исто време многу други трагедии на различни места, а ваша должност е да ги изведете пред лицето на правдата судиите и обвинителите кои во голема мера ја попречуваа правдата во споменатите случаи и во многу други случаи каде правдата воопшто не е задоволена, изјави Бленди Ходаи, иницијатива Нула.
Иницијативата „Нула“ најавува дека во понеделник во Тетово ќе се организира протест на кој пред судот ќе се споменат жртвите од Кочани и ќе се бара повторно судење за сите трагедии.
-Во понеделник во 12:30 часот во Тетово ќе се одржат протести со почеток од плоштадот „Илирија“, а потоа ќе завршат пред судската палата во Тетово, првично во знак на сеќавање на жртвите од Кочани и потоа за барање одговорност за случајот во Кочани но и за болничката катастрофа што се случи пред неколку години во Тетово. Нашите барања како млади, бидејќи иницијативата „Нула“ ја сочинуваат млади луѓе, се сите трагедии што се случија да се судат повторно, изјави Бленди Ходаи, иницијатива Нула.
Инаку, во тетовскиот суд деновиве почна повторното судење за трагедијата со пожарот во модуларната болница.