Главната јавна обвинителка на Израел, Гали Бахарав-Миара, оцени како неважечка одлуката на премиерот Бенјамин Нетанјаху за именување на генерал-мајор Роман Гофман за иден шеф на разузнавачката служба „Мосад“.
Според неа, процесот на именување е „суштински нарушен“, со сериозни пропусти во работата на Советодавниот комитет за високи именувања и во фактичката основа врз која е донесена одлуката.
Бахарав-Миара пред Врховниот суд на Израел изјави дека овие неправилности се доволни за поништување на одлуката на премиерот.
Комитетот за високи именувања, со мнозински гласови, претходно одлучил Гофман да биде назначен за шеф на израелската разузнавачка служба „Мосад“, со петгодишен мандат кој треба да започне на 2 јуни.
Ставот на обвинителката предизвика остри реакции од сојузниците на Нетанјаху. Министерот за национална безбедност, Итамар Бен-Гвир, ја обвини Бахарав-Миара дека „дејствува против државата Израел“ и додаде дека „во Техеран го поздравуваат“ нејзиниот став, додека Гофман „се бори против непријателот“.