По историскиот пласман во главната ждрепка на Вимблдон, македонската тенисерка Лина Ѓорческа го доби својот прв противник на најпрестижниот светски тениски турнир.
По трите последователни победи во квалификациите и обезбедениот настап во главниот турнир, Ѓорческа во првото коло ќе се соочи со Американката Аманда Анисимова, која е поставена за шеста носителка.
Станува збор за една од најсилните противнички во ждрепката. Анисимова минатата година стигна до финалето на Вимблдон, каде убедливо беше поразена од Ига Швјонтек со 2:0 во сетови (6:0, 6:0). Таа во изминатата сезона забележа и финале на Отворено првенство на САД.
За Ѓорческа ова ќе биде најголемиот предизвик во досегашната кариера, но и можност да се одмери со една од најдобрите светски тенисерки на најголемата тениска сцена. Историскиот пласман во главниот турнир веќе претставува значаен успех за македонскиот тенис, а дуелот со Анисимова ќе биде нова можност Ѓорческа да се претстави пред светската спортска јавност.