Македонија летово ќе добие нов голем инфраструктурен проект, откако беше избран изведувач за изградба на втората делница од автопатот Скопје–Блаце. Станува збор за дел долг 10,5 километри, кој треба да обезбеди побрза и побезбедна патна врска со Косово и понатаму со регионот.
Вицепремиерот и министер за транспорт Александар Николоски информираше дека на тендерот е избран конзорциум предводен од домашната градежна компанија „Гранит“, а градежните активности се очекува да започнат во текот на летото.
Според Николоски, проектот претставува еден од најсложените патни зафати во државата, бидејќи предвидува изградба на пет тунели, две галерии, 12 мостови и вкупно околу 40 различни инфраструктурни објекти.
Тој оцени дека изборот на домашна компанија за реализација на проектот е значаен сигнал за македонскиот градежен сектор и доказ дека домашните фирми имаат капацитет да реализираат капитални инфраструктурни инвестиции.
Планот е автопатот да биде завршен за три и пол години, со што ќе се воспостави современа автопатска врска меѓу Скопје и граничниот премин Блаце. Николоски нагласи дека коридорот има големо економско и стратешко значење, бидејќи покрај Косово ќе овозможи подобра поврзаност и со Црна Гора, како и пристап до пристаништето Бар.
Од Министерството за транспорт информираат дека по изборот на изведувачот следува финализирање на административните процедури и обезбедување на банкарски гаранции, по што ќе започнат работите на терен.
Автопатот Скопје–Блаце е со вкупна должина од 12,5 километри. На првата делница долга 2,5 километри градежни активности се одвиваат уште од мај 2020 година.