Група поврзана со Иран соопшти дека извршила сајбер напад врз американската компанија за медицинска опрема „Страјкер Корпорејшн“, тврдејќи дека тоа е одмазда за бомбардирањето на училиште во иранскиот град Минаб, со што дополнително ескалира конфликтот на Блискиот Исток на сајбер фронт.
Нападот го презеде одговорноста хакерската група „Хандала“, која во среда објави дека ја таргетирала компанијата со седиште во Мичиген, голем производител на медицински помагала. Нападот, соопшти компанијата, влијаел на системите на „Мајкрософт“ што ги користат илјадници вработени ширум светот.
„Страјкер“ во соопштението наведува дека се очекува инцидентот да продолжи да предизвикува „прекини и ограничувања на пристапот до одредени информациски системи и деловни апликации“, предупредувајќи дека „временската рамка за целосно закрепнување сè уште не е позната“.
Акциите на „Страјкер“ паднаа за околу 3 проценти откако беше објавен нападот.
Групата „Хандала“, во објава на платформата X, изјави дека „голема сајбер операција е спроведена со целосен успех“ како одговор на она што го нарекоа „брутален напад врз училиштето во Минаб“ и континуираните сајбер напади врз инфраструктурата на таканаречената „Оска на отпорот“.
Во истата објава, тие го нарекоа „Страјкер“ „компанија вкоренета во ционизмот“ и тврдеа, без да обезбедат докази, дека избришале илјадници системи и мобилни уреди и извлекле дури 50 терабајти податоци.
Од друга страна, „Страјкер“ тврди дека во моментов нема индикации дека станува збор за напад со рансомвер или малициозен софтвер и наведува дека верува дека инцидентот е ставен под контрола. Во поднесок до Комисијата за хартии од вредност на САД (SEC), компанијата изјави дека истрагата е сè уште во тек и дека целосниот обем, природата и финансиските последици од нападот сè уште не се познати.
Експертите предупредуваат дека ова може да биде само почеток. Ли Салт, главен истражувач во фирмата за сајбер безбедност „Бинализе“, го опиша нападот како „прва капка крв во водата“, предупредувајќи дека иранскиот конфликт сега се шири кон американските сајбер цели и дека се очекуваат повеќе напади.
Според Софос, „Хандала Хак Тим“ е проирански хактивистички идентитет првпат регистриран во 2023 година. Според разузнавачката фирма Intel 471, групата претходно тврдеше дека компромитирала повеќе нафтени и гасни организации во Израел, Јордан и Саудиска Арабија.
Аналитичарите велат дека зголемената активност на проиранските хакерски групи му дава на Техеран дополнителен простор за проектирање моќ во време кога домашната комуникациска инфраструктура е под притисок, а војната со САД и Израел влегува во сè поширока и опасна фаза.