Силно невреме проследено со олуен ветер попладнево предизвика голема материјална штета и хаос во Скопје и Куманово, а надлежните служби веќе евидентирале над 1.000 повици за помош.
Според информациите од Центарот за управување со кризи (ЦУК), Единствениот број за итни повици 112 е преоптоварен со пријави од загрижени граѓани кои пријавуваат штети од паднати дрвја, откорнати кровови и оштетени возила.
Откорнати покриви од згради и училиште
Меѓу потешките инциденти во Скопје е пријавена падната кровна конструкција од зграда на улицата „Женевска“ бр. 10, која при падот оштетила повеќе паркирани возила. Слична штета е регистрирана и на улицата „Трифун Бузев“, каде исто така е откорнат покрив од зграда.
Ветарот направил штета и на јавен објект — дел од кровната конструкција на основното училиште „Владо Тасевски“ бил целосно откорнат.
Паднати дрвја, уништени автомобили и прекинати кабли
Поради јачината на ветарот, паднати дрвја се регистрирани на повеќе локации низ главниот град:
На улицата „Методија Митевски“ дрво паднало директно врз моторно возило.
Инциденти со паднати дрвја има и на улицата „Никола Тримпаре“, како и на „Хелсинки“ бр. 5, каде се паднати две дрвја.
Драма се случувала и на улицата „Скупи“ бр. 89, каде паднати дрвја отштетиле електрични кабли, патничко возило, а зафатиле и дел од приватна куќа.
Штети регистрирани и во Куманово
Невремето не го заобиколи ниту Куманово, каде на булеварот „Октомвриска револуција“ е пријавена исто така падната кровна конструкција.
Како што извести директорот на ЦУК, Мухамед Али, за сите пријавени случаи веднаш се известени надлежните служби. Сите екипи се веќе излезени на терен и интензивно работат на расчистување на теренот, отстранување на паднатите дрвја и санација на последиците.