Владата на Фиџи прогласи вонредна состојба на национално ниво поради ХИВ, откако официјалните податоци покажаа постојан пораст на бројот на заразени лица во последните години. Според новите извештаи, приближно еден од 60 возрасни жители на Фиџи моментално живее со ХИВ. Пред пет години, тој сооднос изнесуваше еден спрема 167, соопшти Министерството за здравство и медицински услуги, а пренесе ABC News.
Министерот за здравство Антонио Лалабалаву ја прогласи вонредната состојба во вторникот поради зголемениот број на регистрирани случаи. „Со оваа одлука, ја признаваме сериозноста на епидемијата и потребата од итен, координиран одговор на национално ниво“, изјави Лалабалаву. Тој додаде дека мерките што претходно се применувале во познатите жаришта повеќе не се доволни. Министерството наведе: „Повеќе не можеме да работиме како и обично“.
Лалабалаву објасни дека владата прогласила епидемија на ХИВ уште во јануари 2025 година, што довело до значително зголемување на тестирањето. Во текот на 2025 година биле дијагностицирани 2.016 нови случаи – 16 пати повеќе отколку во 2019 година. „Со проширувањето на тестирањето, откривме поголем број заразени лица“, рече министерот.
„Иако дел од ова зголемување произлегува од почестото тестирање, резултатите јасно укажуваат на сериозноста на ситуацијата“. Министерството потврди дека државата обезбедува бесплатно тестирање со моментални резултати, превентивни лекови за лицата со висок ризик, стерилни игли за корисниците на дрога и бесплатно лекување за сите што ќе добијат позитивен резултат. Заедничката програма на Обединетите нации за ХИВ/СИДА (UNAIDS) вчера ја поддржа одлуката на Фиџи и зајакнувањето на мерките, истакнувајќи дека земјата се соочува со една од најбрзо растечките стапки на нови инфекции во светот. „Фиџи ја препозна критичната природа на ситуацијата и го засилува својот одговор“, изјави извршната директорка на UNAIDS, Вини Бјањима.
„Ова исто така служи како силен потсетник за светот дека борбата против СИДА-та не е завршена. Епидемијата на ХИВ може брзо да се промени, па затоа земјите мора да имаат здравствени системи подготвени за итен одговор“. Според податоците на UNAIDS, во повеќе од половината случаи на Фиџи каде што е познат начинот на пренос, вирусот се ширел преку сексуален контакт, додека 42 отсто биле поврзани со употреба на контаминирани игли при користење дрога. Министерството за здравство ја информираше Кристина Кавало, вршител на должност шеф на мисијата во Амбасадата на САД во Сува, за епидемијата. За време на средбата беше потврдено дека САД ќе разгледаат можност за обезбедување техничка помош преку програмата „Страјдс“ (Strides), чија цел е зајакнување на лабораториските капацитети на Фиџи, подобрување на надзорот над болестите и зголемување на подготвеноста за идни епидемии.
ХИВ е вирус што се пренесува преку крв и го напаѓа имунолошкиот систем. Според Светската здравствена организација, доколку не се лекува, може да доведе до СИДА – најнапредната фаза на инфекцијата.