Пратеничката од опозицијата Илире Даути во синоќешната емисија „Клик Плус“ го отвори прашањето за неспроведување на албанскиот јазик во Собранието. Според неа, за неговата примена имало проблеми и во претходниот мандат, но по многу напори било постигнато законите да се доставуваат на двата јазика. Сепак, според неа, ситуацијата се променила од почетокот на мандатот на оваа влада, бидејќи предлозите се испраќаат само на македонски јазик.
„Реално, ова беше практика и во претходниот мандат. За волја на вистината, имавме проблеми со имплементацијата на јазикот. Пошироката јавност многу добро знае дека и тогаш имавме остри реакции за неспроведување на јазикот, но сите заедно успеавме до крајот на претходниот мандат македонските министри и премиерот да ги доставуваат законите на двата јазика. За жал, почетокот на овој мандат нè затекна со предлози кои доаѓаат само на македонски јазик, а најлошо од сè е што дури и првиот предлог што беше поднесен на македонски јазик беше од министерот за здравство“, вели Илире Даути, пратеничка од АА.
Даути вели дека употребата на албанскиот јазик во институциите е задолжителна со закон и бара официјалните материјали да бидат и на албански јазик, бидејќи, според неа, институциите имаат обврска да го спроведуваат Законот за јазици и да создадат услови за негово спроведување.
„Законот за употреба на јазиците има одредба со која ги обврзува државните институции да го имплементираат и да создадат услови за спроведување на законот. Постои и друга одредба која беше многу оспорувана од другата страна, но сепак е дел од законот и вели дека институциите и државните органи кои нема да ги усогласат другите закони со овој, ќе важат одредбите од овој закон, односно Законот за употреба на јазиците“, вели Илире Даути, пратеничка од АА.
Дебатата за статусот и употребата на албанскиот јазик во државните институции останува отворена, додека различните толкувања на уставните одредби продолжуваат да предизвикуваат политички реакции.