Илјадници луѓе на улиците во Виена протестираа против можната екстремно десничарска Влада

Неколку илјади луѓе протестираа вечерва во Виена против формирање влада предводена од екстремно десничарската Партија на слободата (ФПО).

Демонстрантите пред зградата на владата истакнаа транспаренти на кои пишуваше: „Не сакаме крајно десничарска Австрија“ и „Никогаш повеќе е сега“.

Многу слогани беа упатени и против лидерот на ФПО Херберт Кикл како потенцијален канцелар.

Толпата ја исвирка најавата дека ФПО започнува коалициски разговори со конзервативната Народна партија (ОВП), откако разговорите меѓу главните партии пропаднаа. 

ФПО победи на парламентарните избори во есента 2024 година, првпат од нацистичката ера да го стори тоа една крајнодесничарска партија.

Откако партиите од центарот не постигнаа договор за можни коалиции, Кикл доби мандат од претседателот на државата Александар Ван дер Белен да се обиде да формира влада.

Протестот беше организиран од социјални и црковни групи и организации кои се борат за заштита на животната средина и бегалците.

Организаторите предупредија дека „заканата од авторитарен напад врз демократијата, човековите права, заштитата на животната средина и социјалната кохезија се наѕира над земјата“.

На протестот учествуваа и левичарските партии.

Преговорите за формирање коалициска влада ќе почнат утре.