Врховниот лидер на Иран, Али Хамнеи, и иранските медиуми ја објавија смртта на бројни воени функционери и научници во израелскиот напад врз Иран рано наутро во петокот.
Хамнеи потврди дека нивните наследници и колеги веднаш ќе продолжат со своите должности.
Иранската војска соопшти дека вооружените сили и Револуционерната гарда во моментов се вклучени во битки на небото над земјата, чии резултати ќе бидат објавени подоцна.
Американскиот „Аксиос“ цитираше израелски функционер кој изјави дека цел на нападот биле неколку високи ирански воени лидери и врвни нуклеарни научници.
Израелската веб-страница „Вала“ исто така објави, повикувајќи се на безбедносни извори, дека постои голема можност Генералштабот на Иран, вклучувајќи го и началникот на Генералштабот и нуклеарните научници, да биле елиминирани во нападот.
Ова се најистакнатите ирански лидери и научници чија смрт е објавена досега за време на израелскиот напад:
Командант на Иранската револуционерна гарда, генерал-мајор Хосеин Салами
Началник на Генералштабот на иранските вооружени сили, генерал-мајор Мохамад Багери
Командант на воениот штаб „Хатам ал-Анбија“, генерал-мајор Голам Али Рашид
Професор по нуклеарно инженерство Ахмед Реда Золфакари
Нуклеарен научник Мехди Техранчи
Нуклеарен научник Ферејдун Абаси
Иранските медиуми, исто така, објавија, како што ги опишаа, непотврдени извештаи за атентатот врз претседателот на Исламскиот универзитет Азад, Мохамад Мехди Техранџи, а исто така објавија дека Али Шамхани, советник на врховниот лидер на Иран, е повреден во нападот и хоспитализиран во критична состојба.