Соединетите Американски Држави ја отстранија Сирија од листата на држави кои поддржуваат тероризам, со што завршува повеќедецениската ознака која беше проследена со строги економски ограничувања.
Американскиот Стејт департмент, исто така, ја укина ознаката за Фронтот Ал Нусра – подоцна познат како Хајат Тахрир ал-Шам (ХТШ) – како глобална терористичка организација, додека Министерството за финансии најави олеснување на санкциите.
Бунтовниците предводени од ХТШ го соборија Башар ал-Асад во декември 2024 година, а Ахмед ал-Шараа ја презеде функцијата претседател на Сирија.
„Денешниот чекор ќе помогне да се поттикнат дополнителни инвестиции во Сирија со цел да се промовира политичката и економската стабилност“, изјави американскиот секретар за финансии Скот Бесент.
Тој нагласи дека мерките се „во согласност со ветувањето на претседателот Доналд Трамп за олеснување на санкциите кон Сирија“.
Сирискиот претседател Ахмед ал-Шараа ја опиша одлуката како „отстранување на темна дамка“ и отворање ново поглавје за развој и реконструкција на земјата.
Министерот за надворешни работи Асад ал-Шаибани ја оцени одлуката како „историски момент“ кој, според него, ја одразува определбата на новата сириска држава кон мирот и меѓународната безбедност.
Министерот за финансии Мохамед Барниех ја нарече одлуката „успех за сириската дипломатија“, додека гувернерот на централната банка Сафват Раслан оцени дека таа претставува чекор кон повторно интегрирање на земјата во глобалниот економски систем.
ХТШ, кој во минатото беше сириски огранок на Ал Каеда, ги прекина врските со џихадистичката организација во 2016 година. Отстранувањето на Сирија од листата се толкува како знак на доверба во лидерството на Шараа.
На самитот на НАТО во Турција, американскиот претседател Доналд Трамп се сретна со сирискиот лидер, кој се обидува да се наметне како обединувачка фигура по соборувањето на режимот на Асад.
Американскиот државен секретар Марко Рубио изјави дека овој чекор „ги отстранува главните пречки за инвестициите од приватниот сектор во Сирија и го поттикнува економското закрепнување“.
Сириските власти ја опишаа одлуката како голема можност за земјата, која сè уште се соочува со последиците од повеќе од една деценија граѓанска војна. Според организациите за човекови права, во конфликтот загинале повеќе од половина милион луѓе.