Високи воени претставници од САД и Израел се состанаа во петокот во Пентагон, во услови на зголемени тензии со Иран, потврдија во неделата двајца американски претставници, кои сакаа да останат анонимни.
Официјалните лица не дадоа детали за разговорите зад затворени врати меѓу американскиот генерал Ден Кејн, претседател на Здружениот штаб на вооружените сили, и Ејал Замир, началник на Генералштабот на израелските вооружени сили. Средбата беше ненајавена.
САД го зголемија своето поморско присуство и воздушна одбрана на Блискиот Исток во последните денови, откако американскиот претседател Доналд Трамп повторно му се закани на Иран, обидувајќи се да го принуди Техеран на преговарачка маса.
Иранското раководство во неделата предупреди дека нападот на САД врз Иран би можел да доведе до регионален конфликт.
Трамп во неделата изјави дека се надева дека ќе постигне договор со Иран, само неколку часа откако врховниот лидер на Иран, Али Хамнеи, предупреди на ризикот од „регионална војна“ доколку американскиот претседател ги исполни заканите за воена интервенција.
Израелскиот министер за одбрана Израел Кац се сретна со Замир во неделата по неговите состаноци во Вашингтон за да ја процени безбедносната состојба во регионот и „оперативната подготвеност на израелската војска за какво било можно сценарио“, се вели во соопштението.