Израел објави мапа на која е прикажана проширена зона под воена контрола во јужен Либан и соопшти дека не ја исклучува можноста за изведување напади и надвор од неа, доведувајќи ги во прашање условите од американско-иранскиот договор кој предвидува почитување на суверенитетот на Либан.
Висок израелски претставник изјави дека Израел води „упорни преговори“ со администрацијата на американскиот претседател Доналд Трамп за задржување на своите трупи распоредени 10 километри во јужен Либан, додека продолжува со операциите против милицијата Хезболах, поддржана од Иран.
Привремениот договор потпишан во средата за ставање крај на американско-израелската војна со Иран предвидува прекин на борбите на сите фронтови, вклучително и во Либан, како и обврска страните да го почитуваат „територијалниот интегритет и суверенитетот на Либан“.
Израел ги отфрли повиците за повлекување на трупите од јужен Либан, кој го нападна во март како одговор на ракетниот оган од Хезболах. Израелските напади и уништувањето на селата предизвикаа илјадници жртви и раселување на населението.
Хезболах продолжи со напади врз израелските позиции на југот и оваа недела, вклучително и со експлозивни дронови што предизвикаа загинати и повредени меѓу војниците.
Армијата, која во април објави мапа со таканаречената безбедносна зона во јужен Либан, објави нова мапа што покажува дека нејзините сили оперираат неколку километри подлабоко во земјата, вклучително и во близина на упориштето на Хезболах во Набатије, северно од реката Литани.
Израелските сили веќе неколку недели дејствуваат во дел од тие области, но досега војската немаше објавено мапа што ја прикажува проширената зона на контрола, означена со темноцрвена боја на мапата објавена во четвртокот.
Израелски воен претставник изјави дека армијата „ќе продолжи да ги отстранува заканите за војниците и цивилите на Државата Израел што ќе бидат идентификувани надвор од безбедносната зона“, што практично значи дека би можела да изведува напади и подлабоко во либанска територија.
Во телевизиско обраќање во средата, лидерот на Хезболах, Наим Касем, ја отфрли идејата за израелски безбедносни зони на територијата на Либан.