Јапонски суши ресторан денес понуди 510 милиони јени (2,7 милиони евра) за една синоперка туна, што е убедливо највисоката цена платена досега на новогодишна аукција на рибниот пазар Тојосу во Токио.
Уловот, тежок 243 килограми, отиде во сопственост на Кијомура Корпорејшн, оператор на популарниот синџир на суши ресторани „Сушизанмаи“ со седиште во Токио, објавува Ројтерс.
„Се надевам дека економијата ќе се подобри оваа година. Администрацијата на премиерот Санае Такаичи вети дека ќе работи, работи, работи, па затоа ресторанот „Сушизанмаи“ ќе работи, работи, работи. Се надевам дека оваа понуда ќе ги развесели сите“, рече Кијоши Кимура, раководител на компанијата „Кијомура“.
Денешната понуда го сруши претходниот рекорд на Кијомура од 333 милиони јени (1,8 милиони евра) во 2019 година.
„Мислев дека добитната понуда ќе биде малку пониска, можеби околу 400 или 300 милиони јени, но се покажа дека е повеќе од 500 милиони“, изјави Кимура, познат како „Кралот на туната“, за новинарите.
Џиновската туна беше транспортирана до главната филијала на Сушизанмаи, а потоа исечена и дистрибуирана до рестораните низ целата земја.
„Јадењето со туна ќе им се продава на клиентите по нормална цена“, рече Кимура.