Кенија им понуди бесплатни вакцини против ковид на сите дипломати во таа земја, вклучително и илјадници претставници на Обединетите нации, иако не ја заврши вакцинацијата на сопствените здравствени работници на фронтот или на старите лица, па затоа властите беа критикувани.
Понудата е дадена во писмо испратено од Министерството за надворешни работи до дипломатските претставништва на 18 март, а Махарија Камау, генералниот секретар на Министерството за надворешни работи, рече дека понудените вакцини биле доставени преку шемата Ковакс, предводена од Светска здравствена организација (СЗО).
Кенија, каде што скоро 2.000 луѓе починаа од ковид-19, се бори со третиот бран, а Министерството за здравство објави 28 смртни случаи во петокот, што е најголем дневен број од почетокот на пандемијата.