Унгарската компанија 4iG потврди дека разговара за потенцијално проширување на македонскиот мобилен пазар.
Компанијата сака да понуди мобилни и фиксни услуги во земјава, покрај постоечките мобилни оператори Т-Мобиле, А1 Македонија, Лајкамобајл и Телекабел.
Но, кои се 4iG Групација?
Основана како Freesoft во 1990 година, 4iG на берзата во Будимпешта обезбедува голем број ИТ услуги, вклучувајќи развој на софтвер, управувани услуги и сајбер безбедност, како и понуди за управување со центри за податоци и „облак“. Во последната година, компанијата се прошири во нови области, основајќи своја сателитска фирма и купувајќи локални сателитски и телекомуникациски фирми.
Компанијата е втора по големина телекомуникациски оператор во Унгарија, а свое присуство има и на балканскиот пазар.
Во 2022 година, 4iG Групацијата се проширува на телекомуникациските пазари на Западен Балкан, воспоставувајќи значајни позиции во Црна Гора и Албанија преку лансирање на сопствениот телекомуникациски бренд – ONE.
Под брендот – ONE, подружниците на 4iG во Западен Балкан прават значителна трансформација и со тоа станува водечки бренд на пазарот на 5Г мобилни услуги во Црна Гора, додека ОNE – Албанија формирана преку консолидирање на албанските телекомуникациски компании станува врвен телекомуникациски провајдер во земјата.
Покрај тековните инвестиции, 4iG Групацијата во соработка со Телеком Египет планира и инсталација на подводен кабел за пренос на податоци со висок капацитет за поврзување на Египет и Албанија. Овој проект може да донесе дополнителни придобивки за Македонија преку зајакнување на дигиталниот и економски раст на земјата.