Само 10% од активностите планирани за борба против корупцијата и судирот на интереси се реализирани од страна на институциите во земјата во текот на 2022 година, додека оваа бројка е намалена за 10% во однос на 2021 година кога процентот на реализација на националната стратегија за борба против корупцијата е 20 отсто, се вели во извештајот што го подготви Антикорупциската комисија. Според првиот човек на Државната комисија за спречување на корупцијата, Билјана Ивановска, резултатите се поразителни, додека според неа, тоа се должи на малата посветеност на институциите во борбата против корупцијата и незрелоста на општеството.
Со мислењето на Ивановска не се согласува вицепремиерката за добро владеење, Славица Грковска. Според неа најголемиот проблем во борбата против корупцијата е неказнувањето, а како важен фактор ја спомна индивидуалната одговорност.
За евроамбасадорот Дејвид Гир, воопшто не охрабрува фактот што годишниот план за спроведување на националната стратегија за 2021 година се уште не е разгледан во Собранието. Гир, исто така, смета дека слабите напори на институциите во борбата против корупцијата се поразителни.
„Да се вратиме на имплементацијата на националната стратегија, мислам дека и претседателката на Комисијата рече дека резултатите се разочарувачки, само 10% од активностите се целосно спроведени во 2022 година, што е половина од 20% од 2021 година, што само по себе не е добар и кредибилен податок. Ова мора да се подобри, се разбира дека Владата мора да се подобри, се разбира дека важна улога имаат и Собранието, државните институции, судството, политичките партии“, вели Дејвид Гир.
Според извештајот, најопасни фактори кои ја поттикнуваат корупцијата во државата се силното политичко влијание, недостаток на казнување, недоволна транспарентност и дигитализација, злоупотреба на дискреционите овластувања, законски прописи кои оставаат простор за злоупотреба.