Генералниот обвинител на Украина, Руслан Кравченко, поднесе оставка од функцијата, во време кога неговото име е поврзано со истрага за корупција и перење пари.
Одлуката доаѓа неколку дена откако истражители на Националното биро за борба против корупцијата на Украина (НАБУ) и Специјализираното обвинителство за борба против корупцијата (САП) извршија претреси во просториите на Генералното обвинителство.
Според истражните органи, висок функционер во Генералното обвинителство се сомничи дека раководел со шема за перење пари, додека обезбедувал заштита за нелегални центри за телефонски измами во замена за плаќања.
Истражителите соопштија сомнежи дека парите стекнати од криминалната активност биле користени за купување недвижности, накит и други вредни предмети. Станува збор за милионски имот за кој постои сомневање дека бил испран преку оваа шема.
Кравченко ги отфрли обвинувањата, оценувајќи ги како „целосно неосновани“. Во писмото со оставката тој наведе дека не сака функцијата генерален обвинител да биде користена како „средство за политичка пресметка“.
По оставката, Кравченко му се заблагодари на претседателот Володимир Зеленски и на украинскиот парламент за укажаната доверба. Досега, украинскиот претседател нема јавно реагирано во врска со оставката.
Случајот повторно го става во фокус проблемот со корупцијата во Украина, прашање кое предизвикува жестоки дебати и за време на војната со Русија.
НАБУ и САП, двете главни институции во земјата во борбата против корупцијата, беа во центарот на политичките судири и минатата година, кога плановите за ограничување на нивната независност предизвикаа протести и загриженост кај европските партнери на Киев.
По силните реакции, Зеленски ги повлече измените и ја врати независноста на антикорупциските институции. Сепак, последните истраги покажуваат дека корупцијата и понатаму останува еден од најголемите предизвици за украинските власти.