Претседателот на Европски совет, Антонио Кошта, денеска попладне ќе престојува во посета на земјава, каде што ќе се сретне со премиерот Христијан Мицкоски.
Од владината прес-служба информираат дека Мицкоски ќе одржи тет-а-тет средба со Кошта, по што ќе следува состанок меѓу владината делегација и делегацијата предводена од претседателот на Европскиот совет. Потоа, Мицкоски и Кошта ќе одржат заедничка прес-конференција во Владата.
Претседателот на Европскиот совет од вчера е во посета на Западен Балкан, каде што се среќава со лидерите од регионот, а на 5 јуни во Тиват ќе биде ко-претседавач на Самитот ЕУ – Западен Балкан.
Кошта ќе разговара за можностите и предизвиците на проширувањето на Европската Унија, постепената интеграција, регионалната соработка, како и за безбедноста и стабилноста во регионот.
„Мојата втора турнеја низ Западен Балкан испраќа јасен сигнал: посветеноста на ЕУ кон регионот е реална, исто како што е реална и можноста за проширување. Моментот е сега. Време е да се испорачаат резултати“, изјави Кошта пред почетокот на посетата.
Во Скопје тој доаѓа од Тирана, каде што ќе се сретне со албанските лидери, а регионалната турнеја ја започна вчера во Сарајево.
Утре Кошта ќе отпатува во Приштина, а во четврток ќе го посети Белград. Турнејата ќе ја заврши со посета на Црна Гора.
На 5 јуни Кошта ќе биде ко-претседавач на Самитот ЕУ – Западен Балкан 2026, чија главна тема ќе биде: „Заеднички просперитет и стабилност на Европската Унија и Западен Балкан“.