Косовскиот премиер Албин Курти изјави дека прогласувањето за виновни и осудувањето на поранешните лидери на ОВК претставува неправда и голема казна, додавајќи дека оваа пресуда треба што поскоро да биде изменета и исправена во жалбената постапка. Курти рече дека пресудата не е донесена по волја на народот на Косово, а истовремено го обвини Специјалниот суд и за етнички едностран судски процес и недостаток на транспарентност.
„Косово ќе продолжи да ги поддржува Хашим Тачи, Кадри Весели, Реџеп Селими и Јакуп Красниќи во жалбената постапка, со целосна, достоинствена и институционална поддршка. Тоа е наша одговорност кон нашите граѓани и доверба во правото да се оспори пресуда која сè уште не е конечна. Денес беа разгледувани обвиненија и конкретни дејствија; не се судеше за причината поради која беше создадена ОВК, ниту пак таа може да биде оцрнета. Затоа што кога татковината повеќе не можеше да ги трпи крвниците, таа ги повика ослободителите, а нивното име беше Ослободителна војска на Косово“, рече Курти.