Министерот за надворешни работи на Русија, Сергеј Лавров, изјави дека под таканаречените безбедносни гаранции за Украина денес не се подразбира општа европска безбедност, туку продолжување на конфликтот против Русија. Тој во интервју за телевизијата НТВ додаде дека ставот на Москва по ова прашање не се променил. Рускиот министер потсети дека за време на преговорите со украинската делегација во Истанбул во април 2022 година, токму безбедносните гаранции биле клучна тема, пренесува Спутник.
„Таму се зборуваше за Украина, но се предлагаа гаранти да бидат постојаните членки на Советот за безбедност на Обединетите нации, вклучувајќи ја Русија и Кина, со можност за учество и на Германија и Турција. Така приближно беше опишано. Суштината на гаранциите се сведуваше на тоа дека, доколку се случи нешто што не е во согласност со договорите, сите гаранти да се соберат и едногласно, со консензус, да донесат некаква одлука“, соопшти Лавров.
Според неговите зборови, таквиот пристап ѝ одговарал на Москва, бидејќи тоа, како што нагласи, навистина било поврзано со колективен формат во областа на безбедносните гаранции.