И за седум други пациенти со цистична фиброза, од вкупно 55 што чекаат, е обезбеден лекот Трикафта. Терапијата која чинеше 100 милиони денари веќе е на Универзитетската клиника за детски болести и е обезбедена за следните неколку месеци. Министерот за здравство Фатмир Меџити вели дека на секои 10 дена на терапија ќе бидат вклучени по 7 пациенти. Тој рече дека за обезбедување на овој лек за 2024 и 2025 година се планирани 854 милиони денари.
Директорката на Детската клиника, Стојка Нацева – Фустиќ верува дека во 2024 година ќе бидат вклучени сите пациенти кои имаат право на терапија, значи пациентите над 12 години.
Фики Гаспар од Асоцијацијата за цистична фиброза им се заблагодари на институциите и рече дека голем број на родители и пациенти ќе бидат мирни и нема да стравуваат за нивниот и животот на нивните деца.
Оваа терапија ќе го подобри квалитетот на живеење на овие пациенти и ќе го намали хоспитализирањето. Инаку цистична фиброза е ретка болест од која боледуваат околу 130 лица во нашата земја и околу 80 лица го имаат потребниот генотип за да примаат „Трикафта“.