Цените на нафтата денеска забележаа пад, но и понатаму се на пат да остварат значителен неделен раст, откако обновените тензии меѓу САД и Иран ги зголемија ризиците од можни нарушувања во снабдувањето.
Референтната сурова нафта брент се тргуваше по цена од околу 75,5 долари за барел, додека американската сурова нафта WTI достигна околу 71,2 долари за барел, објави „Трејдинг економикс“.
Пазарите внимателно го следат развојот на ситуацијата по новите напади што дополнително го нарушија примирјето меѓу Израел и Иран и предизвикаа загриженост за безбедноста на поморскиот сообраќај низ Ормутскиот Теснец, една од најважните светски рути за транспорт на сурова нафта.