Минерес Ферати од гостиварско Дебреште веќе 20 години живее во Бергамо, Италија. Тој работи вофабрика за производство на автомобилски гуми, но веќе 2 месеца е во изолација. Денеска излезе да купи леб во маркет. Мораше да чека цел час.
„Еден влегува, еден излегува. 5 минути одат на еден човек. Ако има 10 лица пред тебе, чекаш отприлика еден час пред маркет. Се држи растојание од еден метар. Сите се со маски и ракавици. Еден влегува и еден излегува. Не можат да влезат по 3 или 4 лица. Само по еден“, изјави Минерес Ферати – жител на Бергамо, Италија.
Али Ибраими кој е со потекло од Липково, е сопственик на фирма во кантонот Тичино во Швајцарија на граница со Италија. Иако во моментов не работи, вели дека работниците добиваат плата. Али е во изолација со неговото петчлено семејство.
„Бесплатна е помошта. Бесплатен фонд што го дава државниот буџет. И нам, компаниите ни дадоа помош во кредит кој не е гратис но за да излеземе од криза моментално. Швајцарските банки направија една светска новост што не се случила никогаш во банкарскиот систем. Даваат кредити со нула камата. Тоа е новост во Швајцарија. За пет години ти даваат кредит без камата“, вели Али Ибраими – жител на Тичино, Швајцарија
Инаку Италија се соочи со најсериозно ширење на пандемијата во Европа. Италија беше под блокада од 10 март. Ограничувањата истекуваат на 13 април и според извештаите во медиумите, ограничен број индустрии ќе можат повторно да работат после овој датум. Вчера, за прв пат во девет дена падна под 700 бројот на жртви, на 671.