Политичките обвинувања меѓу ВМРО-ДПМНЕ и СДСМ продолжуваат и денеска, откако од ВМРО-ДПМНЕ на прес-конференција изнесоа обвинувања за, како што велат, неусогласеност меѓу европската реторика и практичното делување на опозициската партија.
Претставникот на ВМРО-ДПМНЕ, Манасиевски, изјави дека СДСМ и нејзиниот претседател Венко Филипче се претставуваат како проевропска политичка опција, но истовремено, според неговите тврдења, биле поврзувани со бизнисмени кои имаат проруски интереси.
Тој наведе неколку имиња, меѓу кои Онишченко, Борче Марковски и Миодраг Давидовиќ Дака, тврдејќи дека тие во минатото биле блиски до поранешното раководство на СДСМ.
„Во времето на владеењето на Зоран Заев, овие лица добивале тендери, имоти и државјанства поради блиски релации со власта“, изјави Манасиевски.
Според него, европската ориентација на СДСМ е само декларативна, додека во пракса, како што рече, постапките биле спротивни на европските вредности и стандарди.
Тој се осврна и на претходниот период на владеење на СДСМ, обвинувајќи дека ветувањата за подобрување во здравството, образованието и повисоки плати не биле исполнети.
„СДСМ е антипод на Европа и е полна со корупција и криминал“, додаде Манасиевски.
Од ВМРО-ДПМНЕ порачаа дека партијата ќе продолжи со политики насочени кон европска интеграција на државата, но, како што истакнуваат, на „чесен и достоинствен начин“.