Државната комисија за спречување на корупција (ДКСК) го објави Каталогот на подароци за избрани и именувани лица за 2025 година, во согласност со законските обврски и принципите на транспарентност и отчетност во јавниот сектор, објавува ТВ21. Каталогот овозможува јавен пристап до податоци за пријавени подароци и придонесува за зголемување на отвореноста на институциите, како и за зајакнување на довербата на граѓаните во нивната работа.
„Објавувањето на каталогот претставува важен дел од системот за институционален интегритет, имајќи предвид дека пријавувањето подароци е еден од главните механизми за спречување на судир на интереси и зајакнување на етичкото однесување на носителите на јавни функции“, се наведува во соопштението на ДКСК.
Антикорупциската комисија нагласува дека навременото и целосно пријавување на подароците од страна на службените лица е важен индикатор за нивниот интегритет и одговорност, како и за доследно спроведување на законската рамка.
Во делот за пријави за подароци од јавни службеници, има вкупно 55 случаи, а најмногу се пријавени од страна на државниот ревизор Максим Ацевски, и претседателот на Собранието, Африм Гаши.
Ацевски главно декларирал сувенири како што се: рамки со народни носии, украсни монети, украсни бродови, керамички сувенири, украсни стаклени вазни итн.
Гаши ги пријавил како подароци златен меч во рамка, бисер поставен во златна школка, рачно насликана порцеланска вазна, скулптурата „Глава на коњ“, златни и сребрени монети итн.
Во делот за изјави од вработени, пријавени се 12 случаи. Раководител на сектор во Дирекцијата за индустриски технолошки развојни зони пријавил подарок вино „КАРТАЛ ВРАНЕЦ“ од 0,75 литри, тетратка и глувче во облик на стапче со логото на донаторот, додека советник кај Народниот правобранител пријавил книга во вредност од 300 денари.
Државниот архив на Република Северна Македонија пријавил три клима уреди во вредност од 68 илјади денари, додека Националниот културен центар „Браќа Миладиновци“ во Струга пријавил декоративен предмет изработен од акрил на дрво во вредност од 9.000 денари.
Потсетуваме дека во Каталогот, сите подароци се декларирани како државен имот.
