При посетата на манастирот „Успение на Пресвета Богородица” во Берово, премиерот Христијан Мицкоски, одговарајќи на новинарско прашање за одлуката на Советот на Општина Пехчево за дата-центрите, истакна дека станува збор за приватна иницијатива и не би навлегувал во детали.
„Советот и општината си го кажаа својот збор, но ние како држава апсолутно остануваме на нашата цел за развој на таков тип на индустрија, бидејќи тоа е иднината и тој процес е неповратен процес. Се разбира, во согласност со законите, на места каде што има услови и на места каде што оваа индустрија може да се развие“, изјави Мицкоски.
Од друга страна, тој ги коментираше и критиките од опозицијата на оваа тема.
„Јас ги слушам оние полемики кои што доаѓаат од страна на опозицијата. Дадов вчера свое мислење и не би сакал да се повторувам околу, би рекол и научниот и техничкиот пристап на луѓе кои што не ја познаваат материјата и ја политизираат и ја злоупотребуваат. Далеку од вистина е тоа што го што кажуваат“, рече Мицкоски.
Инаку, вчера премиерот Мицкоски рече дека Владата води преговори со 5-6 инвеститори за изградба на дата-центри во Македонија и дека „нема да отстапи ни милиметар“ од таа намера, како и дека големите светски компании не би ги граделе овие центри доколку тие би биле штетни.
На оваа тема, вчера имаше и размена на обвинувања и од опозициската СДСМ и владејачката ВМРО-ДПМНЕ.
СДСМ ја обвини Владата дека без транспарентност турка проекти за дата-центри, предупредувајќи на можни последици врз водата, енергијата и земјоделството. Од партијата велат дека една компанија објавила оти од Владата обезбедила капацитет од 100 мегавати и директен пристап до реката Вардар за ладење на дата-центрите, за што, според нив, Владата нема дадено информации во јавноста.
Од ВМРО-ДПМНЕ возвратија, обвинувајќи ги социјалдемократите дека со ставовите за идејата за изградба на дата-центри во Македонија не размислуваат за развојот на државата и за придобивките за граѓаните.