Премиерот Мицкоски во објава на социјалните мрежи реагираше на најавените блокади на измените на Изборниот законик од страна на опозицијата.
Според Мицкоски, мотивот зад ваквите блокади на неговите политички опоненти и нивните коалициони партнери е страхот од позитивните резултати што Владата ги постигнува на меѓународен план.
„Исплашени се дека, по декемврискиот извештај, сега и во јунскиот извештај на Европската комисија за напредокот на земјите од Западниот Балкан повторно ќе бидеме најдобри… Но, имам лоша вест за нив: Македонија ќе ве победи вас и вашите блокади“, порача премиерот, додавајќи дека земјата повторно ќе обезбеди најмногу буџетски средства и отворени фондови за финансирање проекти.
Прифатени сите услови, освен правото на глас за иселениците
Премиерот во својата објава открива дека законот, за кој сега опозициските СДСМ и Левица најавија блокада, бил договаран со месеци и дека владејачкото мнозинство ги прифатило сите предлози на опозицијата. Единственото барање од страна на Владата било да се овозможи електронско гласање за дијаспората уште на следните претседателски избори.
Мицкоски посочува дека опозициските партии првично го прифатиле ова решение, но дека сега се повлекуваат користејќи „бледи алиби-аргументи“. Тој повлече паралела со глобалните технолошки трендови, нагласувајќи дека е апсурдно да се кочи овој процес во време кога вештачката интелигенција има клучна улога во светот.
Јавен соочувачки предлог до опозицијата
Со цел да се надмине ќор-сокакот во Собранието, премиерот упати и директен предлог до опозициските пратеници:
Да предложат амандмани за корекција на начинот на заокружување и поднесување приговори (кои Владата експресно ќе ги прифати).
Да ги повлечат останатите амандмани со кои се врши блокада.
Заеднички да се изгласа новиот Изборниот законик.
На крајот од своето обраќање, Мицкоски ги повика политичките противници да покажат вистинска, а не декларативна заложба за евроинтеграциите, но преку реформи, а не преку уставни измени.
„Имате шанса овој пат вистински и суштински да бидете за европската иднина на Македонија, не со менување на Уставот, туку со реформи!“, заклучува премиерот во својот став.