Утре е првиот ден од месец Рамазан. Верниците муслимани се подготвуваат за месецот на постот. Бит пазар на пладне беше преполн со луѓе кои излегле да купат храна.
„Рамазан е олеснување за човекот, а не преоптоварување, јаде помалку и има време на оброк. Времето е убаво, ние сме постеле и на 40 степени кога било жешко, сега е посвежо, подобро, Рамазан е здравје“, вели граѓанин.
„Се спремаме за месец Рамазан, Господ да им даде благослов на сите муслимани па и нам. Колку што гледам цените се исти, нема промени“, додава граѓанин.
Овој пат Рамазан доаѓа во време на пандемија кога човештвото се бори со вирусот Ковид-19. Поглаварот на ИВЗ, Сулејман Реџепи апелира да се почитуваат исламските начела како и тие од лекарите во врска со пандемијата. Според него во секоја џамија секој ден во време на ручекот ќе се пее по една мукабеле.
Постот во исламот е вежба за воздржаност кон храната и пијалакот. Постот за Рамазан е четвртиот од петте стола на Исламот. Верниците муслимани ќе постат секој ден до 23 мај, а на 24 мај се празнува празникот Рамазан Бајрам.