Одлуката на САД за привремено ставање на пауза на постапките за издавање иселенички визи не влијае врз визите за студенти, стопанственици, туристи и други категории, изјави денеска министерот за надворешни работи и надворешна трговија Тимчо Муцунски.
„Не станува збор за прекин или црна листа, туку за пауза само за иселеничките визи. Сите други постапки за визи за САД продолжуваат без промени“, нагласи Муцунски.
Тој информира дека институциите се во постојана комуникација со Амбасадата на САД во Скопје и со Стејт департментот, при што посочи дека интересот од македонски државјани за иселенички визи е мал и најчесто се однесува на повозрасна категорија граѓани.
„Наш приоритет се визите што придонесуваат за развој – за бизнисот, науката, студентите и туризмот. Во тој дел нема никаква промена“, истакна Муцунски, најавувајќи дека во наредниот период може да се очекуваат позитивни поместувања во визната политика на САД кон земјава.