Артан Груби повеќе нема да биде во куќен притвор, откако Основниот кривичен суд Скопје ја укина мерката по сила на законот поради истекот на законскиот рок од 60 дена. Сепак, за второобвинетиот во предметот „Лотарија на Македонија“ остануваат во сила мерките на претпазливост, меѓу кои и забраната за напуштање на живеалиштето, додека предлогот за враќање на патната исправа со гаранција е одбиен.
Од Кривичниот суд информираат дека, согласно член 470 од Законот за кривичната постапка, притворот или куќниот притвор определен по поднесен обвинителен предлог не може да трае подолго од 60 дена од денот на поднесувањето на предлогот.
Бидејќи обвинителниот предлог за предметот „Лотарија на Македонија“ бил поднесен на 13 август 2026 година, Кривичниот совет донел решение за укинување на куќниот притвор за Груби по сила на законот.
Истовремено, судот го прифатил предлогот на Основното јавно обвинителство за определување мерки на претпазливост. Груби ќе има забрана за напуштање на живеалиштето, односно престојувалиштето, ќе мора повремено да се јавува во судот и нема да смее да се приближува до одредени лица, ниту да остварува контакт или врски со нив.
Одлуката за укинување на куќниот притвор не значи дека му се враќа патната исправа. Судот соопшти дека и натаму останува во сила мерката за одземање на пасошот, како и забраната за издавање нова патна исправа или друг документ за преминување на државната граница.
Кривичниот совет го одбил барањето на одбраната за укинување на оваа мерка со определена гаранција, откако добил негативно мислење од надлежното јавно обвинителство.
Груби е второобвинет во предметот „Лотарија на Македонија“, кој се води под број К.бр. 1494/26.